АҚШ қытайлық импортқа баж салығын 104%-ға дейін арттырды

Fox Business телеарнасының тілшісі Эдвард Лоуренс АҚШ билігі қытайлық импортқа баж салығын 104%-ға дейін көтергенін мәлімдеді, деп хабарлайды Zakon.kz.

Бұл туралы ол X әлеуметтік желісінде (бұрынғы Twitter) Ақ үйдің баспасөз хатшысына сілтеме жасай отырып жазды.

"104%-дық қосымша баждар 9 сәуірден бастап күшіне енеді", – деп жазды Лоуренс.

Ол жаңа тарифтер Қытайдың АҚШ-тың баж салығына қарымта ретінде енгізген тарифін алып тастамағанынан туындағанын айтты.

White House Press Secretary says 104% additional tariffs went into effect at noon eastern time because China has not removed it's retaliation. The 104% additional tariff will be collected starting tomorrow April 9th. #trade #Tariffs #POTUS #china

— Edward Lawrence (@EdwardLawrence) April 8, 2025

Айта кетсек, күні кеше Дональд Трамп Бейжің, АҚШ тауарларына 34% баж салығын салатын райынан қайтпаса, қытай тауарларына 50% қосымша тариф енгізетінін мәлімдеген болатын. Өз кезегінде, Қытай жексенбі күні Трамптың өткен аптадағы шешіміне қарымта ретінде, америкалық өнімдерге де 34 пайыз салық енгізетінін хабарлады. Бұған ашуланған Трамп өзінің әлеуметтік желісі арқылы Қытайға ескерту жасады. Тіпті, тариф мәселесі бойынша екі жақты кездесу өткізуден уақытша бас тартатынын да айтты.