Ауа райының қолайсыздығына байланысты Қарағанды әуежайы жабылды, деп хабарлады Хабар 24 ҚР ИДМ Азаматтық авиация комитетіне сілтеме жасап.
«24 желтоқсан күні ауа райының бұзылуына байланысты Қарағанды қаласының әуежайы жергілікті уақыт бойынша сағат 11.00-де жабылды. Желтоқсанның 24-і күні таңертең жаңбырдан кейін әуежайдың ұшу-қону жолағына мұз қатты. Қауіпсіздікті қамтамасыз ету мақсатында 24 желтоқсаннан қазіргі уақытқа дейін ішкі және халықаралық рейстер кейінге шегерілді және тоқтатылды. Әуежай қызметі мұзды кетіру үшін 11 тонна реагент пайдаланды. Сондай-ақ қазіргі уақытта әуежай қызметкерлері мұзды қол күшімен кетіру үшін жеке құрамды жұмылдырды. Жауын-шашын мен қатты соққан жел жағдайды күрделендіріп тұр. Жолаушыларға ұшуды жоспарлаған әуе компанияларының байланыс нөмірлеріне хабарласып, рейстердің жағдайын алдын ала анықтап алу ұсынылады» делінген хабарламада.