Шығыс Қазақстанда бірнеше үй су астында қалды

Құбыр салу үшін қазылған арықтардың бойына жиналған жаңбыр суы бүкіл ауылға жайылды.

Фото: Хабар 2428 Желтоқсан 2017, , 10:48

Шығыс Қазақстан облысының Ұлан ауданындағы Мамай батыр ауылында бірнеше үй су астында қалды, - деп хабарлайды Хабар 24.

Елді мекенге өткен жазда «Таза су» бағдарламасы бойынша республикалық бюджеттен 270 миллион теңге бөлініп, құбыр тартылған. Бірақ ауыл тұрғындарының айтуынша, мердігер компания міндетін дұрыс атқармаған. Құбыр салу үшін қазылған арықтардың бойына жиналған жаңбыр суы енді бүкіл ауылға жайылды.

Қуандық Шәкейдің үйіндегі жерқоймасына құйылған суды арнайы құралмен сорғызып жатыр. Аяқ асты су басқанда, қысқа сақтаған азық-түлігін де толық шығарып үлгермеген. Отағасы бастапқыда судың көзі қайдан келіп жатқанын түсінбеген. Құбыр тарту үшін қазылған жыра арқылы аққан су әуелі ойпаң жердегі үйлерді басқан.

– Мына шлактан салынған үй судың бәрін сорып алды. Ол енді құлайды. Аяз қысқанда, қайта жарылады. Мына жерде көршінің үйі бар. Су оның ар жағындағы көршілерге кетіп жатыр, - дейді Мамай батыр ауылының тұрғыны Қуандық Шәкей.

Соңғы үш тәулікте өңірде күн райы күрт жылынып, жылы жаңбыр жауды. Таулы аймақта биыл қар аз болса да, ол жаңбыр суымен араласып, бұлақ болып ақты. Ал ауылға осы жазда 27 шақырым су құбыры тартылған. Құбыр әлі іске қосылмаса да, оның бойымен аққан су үйлерге кіріп жатыр.Қазір ауыл іші аяқ алып жүргісіз, астаң-кестең.

Аудандық төтенше жағдайлар бөлімінің мамандары кешеден бері үйлер мен көшедегі кәріз жүйелеріне толған суды арнайы құрылғымен сорғызып жатыр.

– Таудың суы жоғары жақтан келіп, құбыр салынған арнаға. Кешеден бері мың текше метрден артық су шығарылды. Қазіргі кезде тағы техника шықырылды, - деді Ұлан аудандық төтенше жағдайлар бөлімінің бас маманы Болатбек Тоқталғазин.

Су құбырын тартуға тапсырыс беріп, мемлекеттік комиссия өткізіп, қабылдап алған аудандық коммуналдық кәсіпорын басшысы осындай келеңсіздіктің болатынын біліпті. Бірақ мердігер компаниядан неліктен қабылдап алғаны түсініксіз.

– Біз мұны қыста істейміз деп жоспарлағанбыз. Барлығын білдік. Енді қай жерден ағып жатқанын анықтап, сол жерді бөгейміз. Мердігер техника алып келді, - дейді Ұлан аудандық МКК директоры Айдар Қилыбаев.

Арықтан аққан суды тоқтату үшін құбырды тартқан мердігер компания өкілдері ауылға қайта шақырылды. Ал су басқан үйлердің сапасын ауданнан құрылған комиссия анықтамақ.

Больше важных новостей в Telegram-канале «zakon.kz». Подписывайся!

СЕЙЧАС ЧИТАЮТ
ПОПУЛЯРНОЕ В СЕТИ