Қазақстанның үшінші ракеткасы Зарина Диас АҚШ-тың Джорджия штатында өтетін турнирдің шешуші кезеңінде өнер көрсетеді, деп хабарлайды zakon.kz.
Алматылық спортшы жартылай финалда бразилиялық Беатрис Хаддад Майяны ұтып кетті - 6: 4, 6: 1. Енді, міне, 24 қазанда ол осы жарыстың атағы үшін шешуші кезеңде бақ сынайды. Ақтық сайыстағы Заринаның қарсыласы - АҚШ-тан келген өте тәжірибелі және атақты теннисші Мэдисон Бренгл. Оны мұнда №1 спортшы ретінде шашбауын көтеріп, ұлықтауда.
Ал Зарина Диас ұйымдастырушылардың есебінде екінші нөмірдегі спортшы. Осы жағынан алғанда, осы жарыстардың екі үздік спортшысы енді алтын медаль үшін таласатын болады.