Бразилия Сенатының комиссиясы Үкіметтің COVID-19 пандемиясына қарсы күрестегі жұмыстарын зерттеп, ел президенті Жаир Болсонаруға айып тақты. Сенаторлардың көпшілігі бұл айыппен келісіп отыр, деп хабарлайды Zakon.kz.
11 сенатордың жетеуі Болсонаруға қарсы дауыс берді.
Болсонаруға тағылған айыптар: эпидемия кезінде санитарлық талаптарды бұзу, өлімге әкелген жағдайлар, қылмысқа арандату, құжаттарды бұрмалау, мемлекеттік қаржыны тиімсіз пайдалану, адамзатқа қарсы қылмыс және әлеуметтік құқықтарды таптау. Оған қоса, айыпталушылар тізімінде оның үш баласы, қазіргі және бұрынғы министрлер, федералды депутаттар мен кәсіпкерлер бар.
Дауыс беруден кейін сенаторлар коронавирустан қайтыс болған 606 мың адамды еске алып, бір минут үнсіздік жариялады.
Сенат комиссиясы мақұлдаған айыптаулардан кейін Болсонару және оның маңайындағы шенеуніктерге қатысты іс бас прокуратура мен Гаагадағы Халықаралық қылмыстық сотқа жіберіледі.
Дайана Тоқберген