Бокстан Қазақстан құрамасы әлем чемпионатын сәтті жалғастырып келе жатыр, деп хабарлайды Zakon.kz.
Olympic.kz кезекті жарыс күнінде шаршы алаңға шығатын қазақстандық спортшылар тізімін ұсынады.
Сербия астанасы Белград қаласында бүгін әлем чемпионатының кезекті жарыс күні басталады. Отандық боксшылар екі сессияда да бақ сынайды.
Күндізгі сессияда 48 келі салмақ дәрежесінде Теміртас Жүсіпов сербиялық Омер Аметовипен кездеседі. 75 келіде Нұрқанат Райыс Молдова спортшысы Влад Гавриличке қарсы шығады. Ал 80 келіде Нұрбек Оралбай Бразилия боксшысы Исаяс Фильгомен қолғап түйістіреді.
Әлем чемпионатының кешкі сессиясында қазақстандықтар 63,5 келіде Санатәлі Төлтаевқа жанкүйер болады. Оның қарыласы Молдова өкілі Василий Чеботарь болмақ.