Алматы қаласы әкімі Бақытжан Сағынтаев жұмыс сапары кезінде Абай даңғылының өтпелі қозғалыс ашылған учаскесін аралап көрді, деп хабарлайды Zakon.kz.
Абай даңғылы Момышұлы көшесі қиылысынан бастап, Наурызбай ауданының әкімшілік орталығына дейін ұзындығы 3,5 шақырым учаскенің құрылысы аяқталуда. Екі бағыт бойынша көлік қозғалысына үш жолақ қарастырылған.
Әшімов көшесінің үстінен 400 метрлік эстакада салынып жатыр. Оны айдың соңына дейін ашу жоспарланған.
Абай даңғылын ұзарту жобасын іске асыру барысында Қарғалы өзені арқылы да көпір салынды. Абай даңғылын қаланың батыс шекарасына дейін ұзарту көліктің кедергісіз өтуіне мүмкіндік берді.
Қала басшысы Бақытжан Сағынтаев жол салып жатқан құрылысшыларға алғыс айтып, оларды алдағы Тәуелсіздік күнімен құттықтады. Жұмысшылар қысқа мерзімде күрделі жобаларды аяқтады, соның арқасында көлік инфрақұрылымы жақсарып, қала тұрғындарының мобильділігі артады.
Сонымен бірге Бақытжан Сағынтаев салынып жатқан Бауыржан Момышұлы метро станциясын аралап көрді, онда әрлеу жұмыстары аяқталып, жабдықтарды іске қосу-жөндеу жұмыстары жүргізілуде. Ағымдағы жылдың соңына дейін Бауыржан Момышұлы және Сарыарқа станцияларын техникалық іске қосу жоспарлануда.
