Мұрат Нұртілеу депутаттардың қарауына Президенттің Ұлытау облысының әкімі лауазымына Әбдіғалиұлы Берік пен Шайдаров Серік Жаманқұлұлының кандидатураларын ұсыну туралы хатын оқып берді.
Ашық дауыс беру нәтижесінде 64 депутаттың 51-і Берік Әбдіғалиұлын қолдады, 13 депутат Серік Шайдаровқа дауыс берген.
Ұсынылған қос кандидаттың да басқарушылық қызметтегі тәжірибесі мол. Екеуі де аталған өңірдің тумасы әрі өз облысында басшылық қызметтер атқарған.
Кезінде Ұлытау ауданының, Жезқазған қаласының әкімі болған Берік Әбдіғалиұлы соңғысында Мәжіліс депутаты болып табылады. Ал Жезқазған қаласының, Нұра ауданының, Жаңаарқа ауданының әкімі болған Серік Шайдаров бүгіндері Қарағанды облысы әкімінің АӨК және ауыл шаруашылығы мәселелері жөніндегі орынбасары болып табылады.
