6 қарашаға қараған түні Еңбекшіқазақ ауданындағы аудандық ауруханаға түрлі жарақаттары бар бес ер адам келіп түсті. Анықталғандай, олардың біріне оқ тиген, ал қалған төртеуі өткір заттан жараланған.
Алматы облысы әкімдігінің хабарлауынша, науқастардың бірі алған жарақаттарынан кейін ауруханада қайтыс болды. Ал екеуі алғашқы көмек көрсетілгеннен кейін амбулаториялық деңгейде ем алу үшін үйлеріне босатылды. Тағы екі ер адам жан сақтау бөлімінде жатыр. Олардың жағдайы өте ауыр деп бағаланады.
Осы фактіге сәйкес, ҚР Қылмыстық кодексінің 99-бабы, 2-бөлігі, 1, 6, 7 және 9-тармақтары бойынша сотқа дейінгі тергеу басталды.
Өңірдегі жағдай тұрақты. Жанжал тұрмыстық сипатта орын алған. Алматы облысы әкімдігі
Айта кетсек, алдында өңір полициясының жаппай төбелеске қатысушыларды анықтап, жағдайдың мән-жайын тергеуге кіріскені хабарланған.
