ТАСС мәліметінше, Шри-Ланканың премьер-министрі Ранил Викрамасингхе сенбі күні қайтадан өзгеше лекпен бұрқ еткен жаппай наразылықтарға байланысты партия жетекшілерінің шұғыл жиналысын шақырды. Сондай-ақ Викрамасингхе парламент төрағасы Махинда Яп Абеиварденге заң шығарушы органның кезектен тыс отырысын шақыруды сұрады.
9 шілдеде көптеген адам президент резиденциясының алдындағы қоршауды бұзып-жарып өтіп, қақпадан секіріп, аумақты басып алды. Ғимаратта мемлекет басшысы болған жоқ. Демонстранттарды тарату үшін полиция көзден жас ағызатын газ қолданды. Кем дегенде 33 адам зардап шекті.
Шри-Ланка 1948 жылы тәуелсіздік алғаннан бері ең үлкен экономикалық дағдарысты бастан өткеріп жатқандығы айтылады. Халықтың өмір сүру жағдайының нашарлауына қарсы наразылық сәуір айында басталды. Дағдарыс пандемияға байланысты шетелдік туризмнің қысқаруынан туындады, бұл валюталық резервтердің жетіспеуіне әкеліп соқтырды. Билік ресурстарды қатаң үнемдеуге және импортты азайтуға мәжбүр болды. Сырттан қарыз алуға, экономикалық дағдарыспен күресуге Шри-Ланканың 51 миллиард долларға жеткен қарызы кедергі болып отыр.
