Орын алған қайғылы оқиғадан кейін арнайы құрылған мобильді топ екі күн бойы мектепте жұмыс істеді. Оның қорытындысына сәйкес, Абай облысы Жарма ауданында суицид жасаған бала оқыған мектеп директоры қызметінен шеттетіліп, сынып жетекшісі жұмыстан шығарылды, деп хабарлайды ҚазАқпарат.
"9-сынып оқушысы Айқын бұл мектепте бірінші сыныптан бастап оқиды. Көпбалалы отбасында тарбиеленген ол бес баланың тұңғышы. Отбасының тұрмыстық жағдайы жақсы. Айқынның бұрын өз-өзіне қол жұмсау әрекеттері болмаған. Ал суицид жасамақ болғанда құтқарылып қалған оның сыныптасы 11-сынып оқушысымен ерегесіп, төбелескені белгілі болды", делінген хабарламада.
Қазіргі уақытта мектеп директоры қызметінен шеттетіліп, сынып жетекшісі жұмыстан шығарылды.
"Сынып оқушыларын әңгімеге тарту барысында Айқынның барлық сыныптасымен сыйластықта болғандығы анықталды. Өзгеге әрдайым көмекке келуге дайын болып, бәрінің көңіл күйін көтеруге тырысатыны айтылды. Кішіпейіл, адамгершілігі мол, әділ, карапайым ретінде сипатталды. Әрдайым сабаққа дайындалып келіп, өз ойын еркін жеткізетін. Озат оқушы болған ол "Үздік аттестатқа" үміткер еді. Мұғалімдерге ешқашан теріс мінезін көрсетпеген. Мәнерлеп оқудан республикалық байқаулардың, бокстан облыстық жарыстардың жүлдегері", делінген мобильді топ ұсынған хабарламада.
