Орталық коммуникациялар қызметінде өткен брифингте журналистер Ералы Тоғжановтан Ақтөбедегі мейрамханаға жұмыс уақытысынан кейін облыс басшысының туған күнін тойлауға қызметтік көліктермен келген аудан басшылары мен әкімдік қызметкерлеріне қандай шара қолданылғанын сұрады. Ақтөбе облысының әкімі Ералы Тоғжанов мерейтойын үйінде атап өткенін айтты.
"Ал егер ол жерде (Ақтөбедегі мейрамхананың жанында. - ред.) көліктер болса, қызметі бар деп ойлаймын, мен тапсырма беріп қойғанмын. Бірақ, менің мәліметім бойынша, сол күні еш жерде бірде-бір мемлекеттік көлік болған жоқ. Ол мүмкін емес, мен бұл сұраққа осылай жауап бере аламын". Ералы Тоғжанов
Желіде қызметтік көліктердің, олардың мемлекеттік нөмірлері мен мейрамхананың фотосуреттері тарап кеткені жөніндегі сұраққа ол мұны құқық қорғау органдары тексеретінін айтты.
"Мұнымен айналысатын құқық қорғау органдары бар. Жұмыстан тыс уақытта ол жерде (Ақтөбедегі мейрамханада. – ред.) қызметтік көліктер болмауға тиіс, болмауы керек еді". Ералы Тоғжанов
Бұл ретте Ералы Тоғжанов құқық қорғау органдары қызметтік көліктер туралы мәліметтерді беріп, олардың жұмыс уақытынан кейін пайдаланылғанын растайтын болса, шенеуніктерге тиісті шара қолданылатынын айтты.