3 тамыз күні кешкісін Қостанай қаласының орталығында патрульдік полиция қызметкерлерінің назарын Mitsubishi автокөлігі аударды. Көлік тізгінінде 48 жастағы қала тұрғыны болған.
Құжаттарды тексеру барысында полиция қызметкерлері көлікте арнайы дыбыс құрылғылары орнатылғанын анықтады. Айта кету керек, оларды рұқсатсыз қолдануға заңмен тыйым салынған. Көліктің бүйір есігінен қаптамадағы пышақ табылса, ал қобдишада сырт келбеті атыс қаруына ұқсас зат анықталды. Екі зат та тәркіленіп, қазіргі таңда оларға тиісті сараптамалар тағайындалды.
Жүргізушіге заңсыз арнайы сигнал орнатқаны үшін әкімшілік жауапкершілік жүктелді. Көлік арнайы тұраққа қойылды. Айта кету керек, биылғы жылдың басынан бері Қостанай облысында 750-ге жуық тыйым салынған зат тәркіленген. Оның ішінде шамамен 700 дана суық қару — пышақтар, кастеттер мен биталар, сондай-ақ 20 шақты газ және травматикалық қару бар.
Заңмен қару-жарақты, есірткіні, жарылғыш заттарды және айналымы шектелген немесе тыйым салынған өзге де заттарды заңсыз тасымалдауға және сақтауға қатаң тыйым салынады. Мұндай құқық бұзушылықтар — олардың сипаты мен жағдайына байланысты — әкімшілік те, қылмыстық жауапкершілікке де әкелуі мүмкін.
Аймақтағы құқық қорғау органдары мұндай заңбұзушылықтарды анықтау мен жолын кесу бойынша жүйелі жұмыстарын жалғастырып жатыр. Полиция азаматтарды қырағы болуға және қолданыстағы заң талаптарын сақтауға шақырады.