Ол Қытайда бірқатар ірі жобалар бойынша келіссөздер жүргізілгенін атап өтті.
"Ең алдымен, бұл қоқыс жағу және қоқыс өңдеу зауытының құрылысына қатысты жобалар, сонымен қатар LRT-ны басқару мен пайдалануға байланысты мәселелер және Астананың шеткі аймақтарында жаңа көлік-логистикалық орталықтар салу жөніндегі жобалар. Қытайлық тарап біздің нарыққа үлкен қызығушылық танытып отыр, менің ойымша, бұл жобалар алдағы үш жылда іске асырылады", – деді Жеңіс Қасымбек.
Астана әкімі мегаполистегі жеңіл рельсті көлік (LRT) желісін іске қосу мерзімі туралы да айтты.
"Алдағы бір ай ішінде біз сынақ режимін іске қосамыз: алғашқы екі пойыз белгілі бір станциялар арасында қатынай бастайды. Кейінгі партия қазан-қараша айларында келеді, соңғысы – желтоқсанда. Біз бүкіл жүйені сынақтан өткізуді жалғастырамыз, бұл орта есеппен үштен алты айға дейін созылады. 2026 жылдың бірінші тоқсанында бұл нысанды толыққанды іске қосуды жоспарлап отырмыз", – деді Қасымбек.
Оның айтуынша, жобаны кеңейту мүмкіндігі де қарастырылып жатыр.
"Иә, біз LRT жобасын одан әрі дамыту мәселелерін қарап жатырмыз, болашақта Қосшы бағытына, Жағалау бағытына және ескі қалаға қарай желілер салу мүмкіндігін қарастырып жатырмыз. Әзірге бұл тек жоспар деңгейінде", – деп түйіндеді Астана әкімі.
2025 жылғы 14 тамызда Жеңіс Қасымбек халықпен кездесуде LRT-ға жол жүрудің алдын ала құнын атады. Оның айтуынша, жоба аясында бір реттік жол ақысы 200 теңгеге дейін болуы мүмкін, ал нақты тариф кейінірек бекітіледі.
2025 жылғы 19 тамызда елорда мәслихатының кезектен тыс сессиясында LRT-ның 18 станциясының атауы бекітілді.