Оның айтуынша, мемлекеттік тіркеудегі дәрілердің ел аумағында нақты қолжетімділігі айтарлықтай төмендеген.
"Дәріханаларда бар препараттардың саны 2023 жылмен салыстырғанда 25,5%-ға азайды – 7 932 атаудан 5 907-ге дейін қысқарды", – деді ол.
Марина Дурманова атап өткендей, ең алаңдатарлық жайт – арзан дәрілердің нарықтан кетуі.
"Бағасы 1 000 теңгеге дейінгі дәрілердің атауы 34,5%-ға азайды. Бұл кейбір арзан препараттардың мүлде жоғалып, олардың орнын қымбатырақ дженериктердің басқанын білдіреді. Оның ішінде 1 500 теңгеге дейінгі 300-ден астам дәріге тұрақты сұраныс болған. Демек, олардың жоғалуы сұраныстың аздығынан емес, басқа себептерге байланысты", – деп түсіндірді сарапшы.
Оның сөзінше, бұл үрдіс биыл да жалғасуда: бағасы 1 000 теңгеден төмен дәрілер нарықтан кетіп, қымбат баламаларға орын босатуда.
Саладағы жағдайды тұрақтандыру үшін Денсаулық сақтау министрлігі шұғыл шара қабылдауды жоспарлап отыр.
"Атап айтқанда, бағасы 1 АЕК-тен (2025 жылы – 3 932 теңге) төмен дәрілердің бағасын мемлекеттік реттеуден босату мәселесі қарастырылуда. Бұл қадам арзан, бірақ әлеуметтік маңызы бар дәрілердің ассортиментін сақтап қалуға бағытталған", – деді Дурманова.
Айта кетейік, 7 қазан күні Денсаулық сақтау министрі Ақмарал Әлназарова отандық фармацевтика саласын қолдау шаралары туралы хабарлаған болатын.