Әкімнің айтуынша, жоба алдағы екі-үш апта ішінде іске қосылуы мүмкін.
"Біз барлық сынақтардан сәтті өттік. Қазір 18 пойыздың барлығы қатынап тұр. Аралығы – шамамен 3,5 минут. Жылдамдығы жоғары, бір нүктеден екінші нүктеге жету уақыты басқа көлік түрлерімен салыстырғанда екі есе жылдам. Қолайлы, заманауи, жүргізушісіз пойыздар. Енді станциялар маңын абаттандыру жұмыстары қалды. Бұл жұмыстар жалғасады. Барлық 15 станцияға жаяу жүргіншілерге қолжетімділік қамтамасыз етуге тырысамыз, тіпті тұрғын үйлер әлі салынып жатқан жерлерде де. Жаздың соңына дейін асфальт төселіп, толық абаттандырылады. Abu Dhabi Plaza, "Астана Арена", Mega, әуежай, жаңа теміржол вокзалы сияқты негізгі станциялардың барлығы дайын", – деді әкім.
Сонымен қатар ол қыс мезгілінде LRT жұмысына қатысты алаңдаушылықтарға да жауап берді. Оның айтуынша, биыл қар тазалайтын техника қолданылмаған, себебі ол енді ғана жеткізіліп жатыр. Алайда келесі қыс маусымына дейін жүйе толық дайын болады. Жеңіс Қасымбек рельстерді қар баспайтынын атап өтті.
Бұған дейін Қазақстанда Инновациялық штаб құрылғанын жазғанбыз.