Қалалық Жол қозғалысын ұйымдастыру және жолаушылар көлігі басқармасының мәліметінше, 30 маусымнан бастап Қарасай батыр және Құлымбетов көшелерінде біржақты қозғалыстың пилоттық жобасы іске қосылды.
Жаңа схемаға сәйкес:
- Қарасай батыр көшесінде Розыбакиев көшесінен Варламов көшесіне дейінгі аралықта қозғалыс батыс бағытында ғана жүзеге асырылады;
- Құлыымбетов көшесінде Варламов көшесінен Розыбакиев көшесіне дейінгі аралықта қозғалыс шығыс бағытында ұйымдастырылды.
Басқарма мәліметінше, өзгерістер Алматы қаласы Полиция департаментінің Әкімшілік полиция басқармасымен бірлесіп жүзеге асырылып жатыр.
"Бұл шаралар көше-жол желісінің өткізу қабілетін арттыруға, көлік жүктемесін азайтуға және жолдағы қауіпті жағдайлардың санын қысқартуға бағытталған. Шешім көлік жағдайын талдау нәтижелері мен тұрғындардың өтініштері ескеріле отырып қабылданды", – деп хабарлады басқарма.
Мамандардың айтуынша, жаңа қозғалыс схемасы көлік ағынын реттеп, жол қозғалысы қауіпсіздігін арттыруға мүмкіндік береді.
Еске салайық, бұған дейін Алматыда Жасыл базар маңындағы бірнеше көшеде, сондай-ақ Прокофьев, Кіші Абай, Тұркебаев, Уәлиханов, Жуков және Манаев көшелерінің жекелеген учаскелерінде де біржақты қозғалыс енгізілген болатын.