Абонемент рәсімдеу үшін көлік құралы ақылы жол учаскесіне іргелес аумақта тіркелуі қажет. Көлік құралының тіркелген жері ҚР Ішкі істер министрлігінің деректер базасы арқылы тексеріледі. Сондай-ақ жол ақысы бойынша берешек болмауы керек.
Абонементті бірнеше тәсілмен рәсімдеуге болады:
- 1403 байланыс орталығы арқылы – таңдалған абонемент құнына сәйкес көлік нөміріне қаражат салып, операторға хабарласу қажет;
- Kaztoll.kz сайты арқылы – жүйеге тіркеліп, көлік туралы мәліметтерді енгізіп, "Абонементті рәсімдеу" бөлімінен айлық немесе жылдық қызмет түрін таңдау керек;
- ақы төлеу пункттері мен клиенттермен жұмыс істеу орталықтары арқылы – оператор көмегімен рәсімдеп, картамен, қолма-қол немесе интернет-банкинг арқылы төлеуге болады.
Компания мәліметінше, айлық абонемент жеңіл көліктер үшін қарастырылмаған. Оның құны көлік санатына және жолдың санатына байланысты белгіленеді.
Ал жылдық абонемент жеңіл автокөліктер үшін 1 АЕК (4 325 теңге) тұрады.
Басқа көлік түрлері үшін жылдық абонемент бағасы жол санатына қарай өзгереді. Мәселен, 16 орынға дейінгі автобустар мен жүк көтергіштігі 2,5 тоннаға дейінгі көліктер үшін I санаттағы жолдарда – 20 АЕК (86 500 теңге), II және III санаттағы жолдарда – 12 АЕК (51 900 теңге) белгіленген.
Ал жүк көтергіштігі 15 тоннадан асатын көліктер, тіркемесі бар жүк автомобильдері мен ершікті тартқыштар үшін жылдық абонемент құны I санаттағы жолдарда – 100 АЕК (432 500 теңге), II және III санаттағы жолдарда – 60 АЕК (259 500 теңге) болады.