Оркестр жетекшісі Пьер Ив Арто бұл туралы әлеуметтік желідегі парақшасында жазып, дайындық сәтінен сурет те жариялады.
Бұл - Рахат-Би Әбдісағынның "Алыстан келіп жеткен ойлар" шығармасын жазуға арналған күн. Контрапунтикалық жағы басым тамаша жұмыс. Бір сөзбен айтқанда, айтулы күн, - деп атап өтті француз флейташысы.
Айта кетсек, аталған концерт 11 қазанда Париж театрында өтеді. Бұл Қазақстан мәдениеті үшін маңызды оқиға екені сөзсіз.
Әбдісағын Рахат-Би - композитор, пианист, өнертану ғылымдарының магистрі, "Дарын" мемлекеттік жастар сыйлығының лауреаты, ТМД Парламентаралық Ассамблеясының мәдениет пен өнерді дамытудағы сіңірген еңбегі үшін құрмет белгісінің иегері, П.И. Чайковский атындағы Халықаралық конкурс лауреаттары қауымдастығының мүшесі, "Қазақстанның 100 жаңа есімі" ұлттық жобасының жеңімпазы.
13 жасында ол консерваторияның ең жас студенті атанған, 18 жасында магистрлық диссертациясын қорғады.
20 жасында Рахат-Би Әбдісағын екі опера жазды ("Күн сәулесі түскен жол" және "Бейтаныс қыз"). 150-ден астам классикалық музыкалық шығармалардың, соның ішінде үлкен симфониялық шығармалардың авторы.
Оның музыкасы Еуропаның, Азияның және Американың әйгілі концерт залдарында орындалған, партитураларын еуропалық және ресейлік баспалар басып шығарады. Бүгінгі таңда ол Қазақстанды танытатын және халықаралық классикалық музыка аренасында мойындалған бірнеше музыканттардың бірі. Батыс мамандары Рахат-Бидің жоғары деңгейлі музыкант, шебер пианист екенін айтады. Оның өз шығармаларын да, әлемдік классиканы да шебер орындауы мамандарды таң қалдырады. Оның шығармаларында ерекше стиль, өзіндік музыкалық тіл бар.
