Пандемия кезінде мейрамханада тойда жүрген қарағандылық судья Естай Исабековтің ісі Жоғарғы Сотта қаралады, деп хабарлайды zakon.kz.
Astanatv.kz телеарнасының хабарлауынша, судьяның әріптестері оның мейрамханадағы қылығы сот этикасының кодексіне қайшы келетінін мойындады, бірақ олар оған жаза тағайындай алмайды, мұны жоғарғы органдар шешеді.
Судья әдебі жөніндегі комиссия Исабековтің "Рубин" мейрамханасындағы мінез-құлқын тексеріп, ол сот әдебі кодексіне қайшы әрекет жасады деп шешті. Комиссия Қарағанды облыстық сотының жалпы отырысында іс материалдарын Жоғарғы Соттың алқасына жолдау туралы мәселені қарауды сұрады, - деді Қарағанды облыстық сотының БАҚ-пен жұмыс жөніндегі судья-үйлестірушісі Еркеш Мәукен.
Бұған дейін Интернетте облыстық соттың судьясы Естай Исабековтің той үстіндегі видеосы пайда болды. Қарағанды облыстық сотында Исабековке қатысты қызметтік тексеру жүргізілді. Кейінірек той ұйымдастырушысы судьяның бауыры болып шықты. Ол айыппұл төледі.