Алматы облысында ер адам өзенге ағып кетті, деп хабарлайды zakon.kz.
Алматы облысы Кеген ауданындағы Шарын өзеніне ағып кеткен 37 жасар азаматты құтқарушылар іздестіріп жатыр. Бүгін - 1 шілдеде сағат 11.15-те "112" пультіне осындай хабар түскен. Іздестіру жұмыстарын жүргізу үшін оқиға болған жерге тез арада Алматы облысы Төтенше жағдайлар департаментінің қызметкерлері мен құралдары жіберілді. 15 адамнан және 4 техникадан тұратын жеке құрам оқиға орнында жұмыс істеді. Сағат 12:05-те оқиға орнына сегіз адамнан және бір кинолог қызметінен тұратын ҚР ТЖМ республикалық жедел-құтқару жасағының мамандары жетті. Кейін "Қазәуеқұтқарудың" тікұшағы көкке көтерілді, деп хабарлайды ҚР ТЖМ баспасөз қызметі.
Кей дерек көздеріне сәйкес, ер адам туристік топпен жүріп, фотоға түсемін деп суға ағып кеткен.
