Алматының орталығында төрт ескі автокөлік бірінің артына бірі соғылып, бірден төрт жүргізушінің бүгінгі көңіл-күйі бұзылды, деп хабарлайды Zakon.kz.
Бұл жайсыз жағдай Байтұрсынов көшесінде, Әйтеке би мен Гоголь көшелерінің аралығында болды.
Ford мінген тұрғын тоқтай алмай, Mitsubishi Lancer-ді соқты. Соққы алған аласа Lancer алдындағы асты биік Mitsubishi Montero-ның бұтына тұмсығын тықты, Montero болса, өзінің алдындағы кәрі Volkswagen Passat көлігін осы оқиғаның төртінші қатысушысы етіп қойды.
Жол оқиғасынан Mitsubishi Lancer-дегі жолаушы әйел жарақат алды. Полицейлер мән-жайды анықтауға кірісті.
