Диспетчерлік қызметке №131 бағыт бойынша келе жатқан автобустан өрт шыққаны жөнінде ақпарат 15 ақпанда сағат 8:28-де түскен.
Алматы қаласының қалалық мобильділік басқармасының мәлімдеуінше, техникалық ақауды байқаған жүргізуші нұсқаулыққа сәйкес автобустағы жолаушыларды аялдамаға түсіріп кеткен.
"Бұдан соң автобус техникалық ақауларды жою үшін автопаркке бет алды. Әл-Фараби даңғылымен оңтүстік бағытта келе жатқанда қозғалтқыш бөлімінен өрт шығады. Жүргізуші өрт сөндіргішпен өртті сөндіру бойынша жедел шаралар қабылдайды, алайда біраз уақыттан кейін жарылыс болды. Сағат 8:45-те оқиға орнына келген ТЖД қызметкерлері өртті оқшаулап, 8: 50-де өрт ошағын толығымен жойды".Алматы қаласының қалалық мобильділік басқармасы
Басқарма жәбірленушілер мен зардап шеккендер жоқ екенін, қазір оқиға орнында уәкілетті органдар жұмыс істеп жатқанын хабарлады.
"Өрт нормативтік пайдалану мерзімі аяқталып қалған "ЛИАз" маркалы автобуста болған. Автопарктің техникалық жай-күйін жоспарлы тексеру кезінде осы маркалы автобустардың тозығы жеткені анықталды. Сондықтан көрсетілетін көлік қызметтерінің сапасын және жолаушылардың қауіпсіздігін арттыру үшін автопарк ескі көліктерді ауыстыру үшін жаңа жылжымалы бірліктерді сатып алуды жоспарлады".Алматы қаласының қалалық мобильділік басқармасы
Ведомство жылжымалы составты жаңарту мақсатында Алматы қаласының әкімдігі жаңа автобустар сатып алып жатқанын мәлімдеді.
