"Қазавтожол" ММ мәліметінше, Ақтөбе өңірінің жергілікті атқарушы органы мен төтенше жағдайлар департаментінен осындай өтінім түскен.
"Қобда ауылын су алмас үшін және жергілікті тұрғындардың қауіпсіздігін қамтамасыз ету үшін республикалық маңызы бар “Самара-Шымкент” тасжолының 613 шақырымындағы учаскесін қазу туралы шешім қабылданды. Жол бөлігін қазу жұмыстары басталды. Балама бағыт келесідей: Орал-Қобда-Ойыл-Шұбарқұдық-Ақтөбе", делінген хабарламада.
Өңірде су тасқыны қаупі сейілгеннен кейін жол қалпына келтіріледі.
Айта кетсек, өткен демалыс күндері Атырау облысындағы Миялы ауылын су алмас үшін жолды қазуға тура келгені хабарланған болатын.