Бұл туралы Астананың мамандандырылған ауданаралық әкімшілік сотының судьясы Жанар Дүйсенова Facebook-тегі парақшасында айтты.
"Қазақстан азаматы 2001 жылы туған ұлын емдету үшін Оңтүстік Кореяға апарған. Баланың диагнозы – обыр дерті. Ұлы ауруханада көз жұмған. Қаралы ана Корея Республикасындағы Қазақстан елшілігіне ұлының денесің елге жеткізу үшін шығынды өтеу бойынша қаржылық көмек сұрап, өтінішпен жүгінген. Бірақ мәселе шешімін күтпестен қайырымдылық есебінен мәйітті мәйітханада бальзамдап сақтау, Қазақстанға әуе көлігімен тасымалдау жөніндегі қызмет төленген" деп жазады судья.
Ол СІМ осылайша әкімшілік рәсімді тоқтатып, қаржылық көмек көрсетуден бас тартуға негіз бар деген шешімге келгенін айтады.
"Марқұмның анасы бұл жағдаймен келіспей, Астанадағы сотқа жүгінді. Істі қарау кезінде сот ұлы қайтыс болған күні ертеңінде әйелдің елшілікке жүгінгенін анықтады. Қазақстан азаматы қайтыс болған жағдайда консул оны тиісті құрметпен жерлеуге немесе қайтыс болған адамның денесін Қазақстанға жеткізу шараларын қабылдайды" деп атап өтті ол.
Сот қазақстандық дипломаттар (консул) марқұмды жерлеу немесе қайтыс болған адамның денесін жіберу бойынша шаралар қабылдауға міндетті деп есептейді. Ережелерде мұндай шығындарды өтеуге тыйым салынбайды.
"Соттың пікірінше, елшілік бұл әрекеттерді қаржылық көмектен және тиісті рәсімдерден бас тарту ретінде негізсіз бағалады. Талапкердің жерлеу қызметінің қызметтерін қарыз қаражаты мен жиналған қайырымдылықтар есебінен төлеуі мемлекетті шетелде қиын жағдайға тап болған өз азаматтарына қаржылық көмек көрсету міндетінен босатпайды. Белгіленген мән-жайларды ескере отырып, сот талапкердің талаптарын толық көлемде қанағаттандырды", деп нақтылады судья.
Министрлік өтініш бойынша қозғалған әкімшілік рәсімді қайта жүргізіп, соттың құқықтық ұстанымын ескере отырып, қолайлы әкімшілік акт қабылдауға міндеттелді.