Павлодарда Шөкин – Гагарин көшелерінің аумағында орналасқан қоқыс жәшігінен жаңа туған сәби табылды, деп хабарлайды pavlodarnews.kz.
Айта кетейік, Instagram әлеуметтік желісінде кеше, 29-қаңтар күні кешкі уақытта көшеден өтіп бара жатқан ер адам жаңа туған баланы тауып алғаны туралы ақпарат таралған.
Жарық дүние есігін енді ашқан сәбидің жағдайы туралы бүгін өңірлік коммуникациялар қызметінде өткен баспасөз жиынында облыстық денсаулық сақтау басқармасының басшысы Ораз Мұқашев айтты.
- Нәрестенің дені сау, - дейді Ораз Мұқашев. – Көрпешеге оралған күйінде жатқан. Кеше жедел жәрдем мамандары перинаталдық орталыққа жеткізгені туралы баяндады. Дене температурасы 35,4 градусты құраған сәбиге жансақтау шаралары жүргізілді. Бүгінгі таңда жағдайы орташа ауыр деп бағаланады. Сараптама нәтижесі суық тигенін көрсетуде.
Оның қанша уақыт далада жатқаны белгісіз. Ұл бала. Салмағы - үш жарым келі. Бұл жағдай жөнінде ішкі істер органдарына хабарланды. Оның айтуынша, айы-күні жетіліп туған ұл балаға шамамен 10-12 күн болған.
2018 жылы 1-қаңтардан бастап облыста 570 ұл бала дүниеге келген. Қазіргі таңда барлық құжаттар бойынша тексеру жүргізілуде. Соңғы төрт айдың ішінде Ертіс өңірінде өз баласынан бар тартқан 10-нан астам жағдай тіркелген.