Қазақстанның бірқатар облыстарында оқушыларға смартфондарды ұстауға тыйым салу мәселесі қарастырылуда. Бұл туралы «ҚазАқпарат» ХАА-ға ҚР БҒМ Балалардың құқықтарын қорғау комитетінен хабарлады.
«Бірқатар өңірлерде (Алматы қаласында, Алматы, Ақмола, Атырау, Ақтөбе, Жамбыл, Қызылорда, Қостанай, Маңғыстау, Павлодар, Батыс Қазақстан, Солтүстік Қазақстан және Оңтүстік Қазақстан облыстарында) мектеп оқушыларына тек түймелі ұялы телефондарды қолдану туралы мәселе қарастырылуда. Бұндай шешім оқушылардың ата-аналарымен келісілгеннен кейін қабылданды», - деп атап өтілген Комитеттің «ҚазАқпараттың» ресми сауалына берген жауабында.
Айта кетейік, «Білім туралы» Заңы аясында оқушылар мектептің ішкі тәртіп ережелерін сақтауға міндетті. Ережелерде олардың бұзушылықтары үшін қабылданатын шаралар тіркеліп, ата-аналардың (заңды өкілдерінің) қатысуымен әрбір жағдай бойынша жеке педагогикалық кеңестерде қаралады.
«Комитет білім беру ұйымдарында планшеттерді және смартфондарды қолдану туралы аталған мәселе мектептердің ішкі тәртіп ережелерімен реттелетіндігін хабарлайды. Сонымен қатар, Қазақстан Республикасының заңнамасымен ішкі тәртіп қағидаларын әзірлеп, бекіту жергілікті атқарушы органдардың және сол білім беру ұйымдарының құзыретіне жататындығы бекітілген», - делінген Комитет мәліметінде.