Алматы облысы, Қапшағай қаласында пәтерлерді бірлесіп тонаған бір топ ұры ұсталды, деп хабарлайды Today.kz.
Порталдың жазуынша, күдіктілер қылмыс үстінде қолға түскен.
"Ұсталғандардың Қапшағайда тіркелген 20 ұрлыққа қатыстары бар екені анықталды. Барлық эпизодта қылмыс жасау тәсілі бірдей – қаскөйлер пәтерлерге есіктің кілтін сәйкестендіріп ашып кірген", – деді Алматы облысы ІІД баспасөз қызметінің өкілі.
Полиция қызметкерлерінің айтуынша, топ 2017 жылы және осы жылдың басында ұрлық жасаған. Алдын ала болжам бойынша келтірілген шығын көлемі 10 миллион теңгеден асады.
Полицияның сөзінше, бір топ ұрының ішінде үш ер адам және бір әйел адам бар. Жастары 30-35 аралығында.
Күдіктілер қамауда. Қазір олардың Алматы облысы бойынша басқа да ашылмаған ұрлықтарға қатыстарының бар-жоғы анықталуда.
