Бүгіннен бастап Qazaq Banki-нің жеке тұлғаларға депозиттер мен шоттар ашуға лицензиясы тоқтатылды, деп хабарлайды ҚазАқпарат ҚР Ұлттық банкінің баспасөз қызметіне сілтеме жасап.
«Ұлттық банктің 27 сәуірдегі қаулысымен 2018 жылдың 28 сәуірінен бастап 2018 жылдың 27 шілдесіне дейін «Qazaq Banki» АҚ-ның жеке тұлғалардың банк шоттары мен депозиттерін ашуға лицензиясы тоқтатылды», - деп хабарлады қаржы реттеуші.
Аталып өтілгендей, мұндай шешім банктің «ҚР банктері мен банк қызметтері туралы» Заңының 48-бабы 1-тармағындағы талаптарының бұзылуына байланысты қабылданды.
Лицензия жеке тұлғаларға жаңа депозиттер мен жаңа банк шоттарын ашу үшін тоқтатылды. Бұл шараның банктің қазіргі депозиттері мен клиенттеріне қызмет көрсетуге қатысы жоқ.
2018 жылдың 1 сәуіріндегі жағдай бойынша Qazaq Banki-нде қабылданған жеке тұлғалардың депозиттер көлемі 41 млрд теңгені құрайды.
