ҚР Ішкі істер министрі Қалмұханбет Қасымов жас жігітті қағып өлтірген Риддер әкімі орынбасарының үстінен қозғалған істі тежеуі мүмкін бе деген сұраққа жауап берді, деп хабарлайды Zakon.kz.
«Істі тежеуі мүмкін деген не сөз?! Адам тұтқынға алынды. Ол жерде анықтау қажет жайттар бар. Тергеп жатырмыз. Кінәлілердің барлығы жазаға тартылады», - деді ол.
Еске сала кетейік, 15 сәуірде сағат 21.00 шамасында Риддерде қала әкімінің орынбасары Б. Құрманбаев «BMW Х5» автокөлігін басқарып келе жатып, жоғары жылдамдықта 19 жастағы Е.В. Смольниковты қағып кеткен болатын. Оқиға салдарынан бозбала көлік апаты болған жерде көз жұмды.
Жол-көлік оқиғасы кезінде автокөліктің ішінде Б.П. Құрманбаевпен бірге Өскемен қаласының әкімі Қ.М. Тумабаев болған.