Парламент Мәжілісінің отырысында "ҚР Үкіметі мен ҚХР Үкіметі арасындағы Қорғас өзеніндегі "Шүкірбұлақ (Алмалы)" бірлескен сел ұстайтын бөгетін салудағы ынтымақтастық туралы келісімді ратификациялау" туралы ҚР Заң жобасы талқыланды, деп хабарлайды Zakon.kz.
«Өткен жылдың маусым айында біздің Үкімет пен Қытай Үкіметі арасында «Қорғас» өзенінде «Шүкірбұлақ» бөгетін бірлесіп салуға арналған келісімге қол қойылды. Аталған бөгет «Қорғас» халықаралық орталығының қауіпсіздігін қамтамасыз ету үшін қажет. Себебі орталық өте жоғары сел мен тасқын қаупі бар аумақта орналасқан", - деді Ішкі істер министрі.
Қ. Қасымовтың айтуынша, құрылысқа екі жақ тең қаржы бөлетін болады. Құрылыстың жалпы сметалық құны 11,7 млрд теңге. Бұған керекті қаражат 2018-2020 жылдарға арналған республикалық бюджетте қаралған.
Талқылаудан кейін палата депутаттары «ҚР Үкіметі мен ҚХР Үкіметі арасындағы Қорғас өзенінде «Шүкірбұлақ (Алмалы)» бірлескен сел ұстайтын бөгетін салудағы ынтымақтастық туралы келісімді ратификациялау туралы» заң жобасын бірауыздан мақұлдады.
Гүлім Тоқтарбаева
