Алматыда өрт сөндіруші 8 жастағы қызды өртенген пәтерден аман-есен алып шықты, деп хабарлайды ҚазАқпарат тілшісі.
Қалалық ТЖД баспасөз қызметінің хабарлауынша, төтенше жағдай бүгін Медеу ауданындағы «Төлебаев көшесі, 37» мекенжайы бойынша орналасқан үйде болған.
Өрт сөндірушілер оқиға орнына 7 минутта жеткен.
Белгілі болғандай, 4 қабаттағы пәтерлердің бірінде ас үй жиһазы өртенген.
Пәтерде 8 жастағы қыз бала болған. Өрт сөндіру қызметінің түтіннен қорғау звеносының қызметкерлері қою түтін арасынан 8 жастағы қызды аман алып шықты.
Өрт 12:04-те сөндірілді. Ешкім жапа шеккен жоқ.
Қалалық ТЖД өкілдері тұрғындарға кішкентай балаларды жалғыз қалдырмауды ескертеді.