Қазақ телеарналарының қатары "Домбырамен" толықты, деп хабарлайды Zakon.kz Алтайньюске сілтеме жасап.
Бұл туралы жаңа арнаның директоры Қанат Ержігітов айтты.
– Бұл салада тың дүниелер жоқтың қасы, сондықтан Алматы мен Астана қалаларында екі айдан бері түсірілім жұмыстары жүріп жатыр. "Домбыра" қазір ID tv кабелдік жүйесінде тестілі режимде тұр. Жұма немесе дүйсенбі күні толықтай қосылады. Әр қазақ дәстүрлі өнерді кез-келген уақытта теледидарды қосып, көре алатындай болу керек қой, біздің мақсатымыз осы. Телеарна тек домбыра жайлы емес, жалпы ұлттық музыка аспаптары жайлы хабар тарататын болады, – деді Қанат Ержігітов.
Осыдан екі жарым жыл бұрын "Жұлдыз" арнасын ашқан іскер азамат сол кездерде көрермен тарапынан "сіздер қазақтың дәстүрлі ән-күйлерін берсеңіздер" деген өтініштер-тілектер көптеп келіп түскенін айтады. Кейін зерттей келе, расымен де, дәстүрлі музыка бойынша телеарна жоқ екеніне көз жеткіздім дейді арна басшысы.
"Домбыра" арнасы жүз пайыз қазақ тілінде 24 сағат бойы қазақ өнері жайлы хабар таратады.
