Мадридтің "Реалы" "Пари Сен-Жермен" және Франция құрамасының шабуылшысы Килиан Мбаппені сатып алмақ. Бұл туралы France Football хабарлайды.
Басылымның ақпаратынша, жақын арада "корольдік клуб" 20 жастағы ойыншының трансфері жайында келіссөздерге кіріспек. "Реал" француз футболшысы үшін рекордтық 280 миллион евро төлеуге дайын.
Мбаппені клуб президенті Флорентино Перес пен бас бапкер Зинедин Зидан қалап отыр.
Егер Мбаппе "Реалға" ауысуға келіссе, оның трансфері футбол тарихындағы ең қымбат трансфер болмақ. Қазіргі рекордтың авторы – футболшының клубтасы Неймар, ол 2017 жылдың жазында "Барселонадан" ПСЖ-ға 222 миллион евроға ауысқан.
Биылғы маусымда Мбаппе Франция чемпионатында ПСЖ сапында өткізген 23 ойында 26 доп соғып, он нәтижелі пас берді. 2018 жылы әлем чемпионы атанды. Сондай-ақ, Мбаппе CIES Football Observatory сараптамалық компаниясының тұжырымынша әлемнің ең қымбат ойыншысы саналады – оның трансферлік құны 216,5 миллион евроға бағаланған.