2019 жылғы 1 сәуірде сағат 09-30 да Шымкент қаласы Полиция департаментінің ғимаратында 21 наурыз күні Атырауда қызды құтқарам деп өз өмірін қиған полиция сержанты Шалқар Ақымғалиевтың құрметіне арналған еске алу салтанатты жиыны өткізілді, деп хабарлайды Zakon.kz Шымкент қаласы ПД Баспасөз қызметіне сілтеме жасап.
Айта кетейік, 21 наурызда сағат 21.52-де "102" нөміріне белгісіз біреуден орталық көпірден бір адамның секіргенін жайлы хабарлама келді. Оқиға орнына жедел түрде Атырау полиция басқармасының қызметкерлері жөнелтіледі. Алғашқылардың бірі болып патрульдік полициясының сержанты Шалхар Ақымғалиев жеткен. Ол ойланбастан мұздай суға секірген. Шалхар Ақымғалиевтың денесін сағат 00.50-де тапқан. Оның денесі ағыстың төмен жағында табылып, жағалауға жеткізілген. Ішкі істер органының қызметкерлері қазаға байланысты оның отбасы мен туыстарына көңіл айтты. Атырауда қызды құтқарам деп суға кеткен Шалқар Ақымғалиев мемлекеттік наградаға ұсынылады.
Полиция қызметкері 24 жастағы патрульдік полицияның сержанты Шалхар Ақымғалиев көп балалы отбасыда тәрбиеленген. Үйленбеген. Шалхар отбасының жалғыз асыраушысы болған. 1 сәуірде ол 25 жасқа толар еді. Ол полицияда 5 жыл жұмыс істеген.
Шымкент қаласы Полиция департаментінің бастығы полиция полковнигі Ералы Мұсаәліұлы Жұмаханбетов кіріспе сөз айтып, ерлікпен қаза тапқан полиция сержанты Ақымғалиев Шалқардың отбасына қайғыларына ортақтасып, көңіл айтты. Сондай-ақ, жиынға ІІО Қоғамдық кеңестің төрағасы, ІІО ардагері, милиция генерал-майоры Жеңісбай Сұлтанов жас полиция қызметкерлеріне Шалқардың ерлігін дәріптеп, ұмытпайтынымызды атап өтті. Патрульдік полиция полкінің қызметкерлері үндеу тастап, Ш.Ақымғалиевтің отбасына Шымкент қаласы Полиция департаментінің жеке құрамы тарапынан материалдық көмек көрсетілетін болды.
Жиын соңында Шымкент қаласы Полиция департаментінің қызметкерлері Шалқар Ақымғалиевке арнап шынар ағашын отырғызды.
