Бублик Медведевпен Almaty Open финалына берілетін жолдаманы сарапқа салады
Сурет: ktf.kz
Алматыдағы турнирдің ширек финалындағы үшінші матчта бірінші ракеткамен тіркелген Даниил Медведев кортқа шықты. Ресейлік теннисші франциялық Теренс Атманды 6:4, 6:4 есебімен жеңді.
Одан кейін жартылай финалға берілетін соңғы жолдаманы ресейлік Карен Хачанов пен Александр Бублик сарапқа салды.
Тең дәрежедегі қарсыластардың тартысты ойыны матчтың соңғы сәтіне дейін "Алматы Арена" кешенін лық толтырған жанкүйерлерді толқытты.
Бір брейк жасаған Хачанов алғашқы сетте 6:4 есебімен басым түсті. Екінші сет тай-брейкке ұласып, онда қазақстандық теннисші 7:6(7:5) есебімен жеңіске жетті.
Шешуші сетте де ойын барысы қайталанып, Бублик тағы да 7:6(7:5) есебімен басым түсті. Осылайша, Қазақстанның бірінші ракеткасы тартысты кездесуде жеңіске жетіп, келесі кезеңге жолдама алды.
24 қазанда жартылай финалда Александр Бублик Даниил Медведевпен кездеседі.
