Алматы Полиция департаментінің бастығы тұрғындармен өткізген есептік кездесуде қылмыстық жағдайға қатысты деректерді айтып берді, деп хабарлайды Zakon.kz.
Полицейлер 2018 жыл қорытындысы бойынша және 2019 жылдың алғашқы үш айындағы көрсеткіштерді тұрақты деп бағалауда.
– 2019 жылдың 3 айында бұрын жасалған 1652 қылмыс ашылды, пәтер ұрлығы 41%-ға, көлік айнасын ұрлау 2,4 есеге, зорлау 8,4%-ға азайды. 2018 жылы 6570 қылмыс ашылған. 2018 жыл мен 2019 жылдың үш айында құқық қорғау органдарының қызметкерлері 4 мыңнан астам қылмыскерді ұстап, ұрлықпен айланысатын 118 топты құрықтады, – деді Алматы қалалық Полиция департаментінің бастығы Серік Күдебаев.
Оның айтуынша, полиция ұрланған заттар сатылатын орындарды анықтап, жиі-жиі рейд жүргізеді. Қоғамдық көлікте қалта ұрыларымен күресетін 12 мобильді топ жұмыс істейді.
– Ұрланған тауар саталытын жерлер – Car City сауда үйі, "Жібек жолы" базары, сондай-ақ Olx.kz, Kolesa.kz, Маrket.kz интернет-ресурстары ", – деді Күдебаев.