22 қазанда Токиода Жапонияның жаңа императоры Нарухитоның салтанатты түрде таққа отыру рәсімі өтіп жатыр. Ресми салтанатты шараға Елбасы да қатысты, деп хабарлайды Zakon.kz.
Қазақстан Республикасы Тұңғыш Президентінің баспасөз хатшысы Айдос Үкібай Instagram-да Елбасы фракты бірінші рет киіп тұрмағанын жазған.
- Қазақстанның тұңғыш Президенті Жапония Императоры Нарухитоның таққа отыру ресми рәсіміне қатысты. Жапон тарапы бұл шараға сәйкес арнайы киім үлгісін белгілеген. Оған сәйкес, рәсімге қатысушылардың барлығы, соның ішінде делегация басшылары "Ақ галстук" дресс-кодымен жүруі керек. Елбасы фракты бірінші рет киіп тұрған жоқ. Нұрсұлтан Назарбаев әрқашан осы деңгейдегі іс-шараларда белгіленген киім үлгісін ұстанады, - делінген хабарламада.
БАҚ беттерінде Нұрсұлтан Назарбаевтың киімге келгенде таңдауы, әдетте галстугі бар көк қою түсті костюм-шалбарға түсетіні айтылады. Елбасы 2008 жылы әйелдерді 8 наурыз мерекесімен және 2014 жылғы Жаңа жылдық құттықтаудағы видеода фракта көрінген.
Фрак - ақ түсті галстук киімінің дресс-коды. White tie - бұл киім үлгісінің ең қатаң түрлерінің бірі.