"Оралман" сөзін "қандас" дегенмен алмастыру жайы талқыланып жатыр", - дейді ҚР Еңбек және халықты әлеуметтік қорғау министрі Біржан Нұрымбетов Мәжілістен тыс дәлізде журналистерге берген сұқбатында, деп хабарлайды zakon.kz.
- Мемлекет басшысы "оралман" терминін "қандас" етіп өзгерту туралы тапсырма бергенін білетін боларсыздар. Сондықтан, бұл норма осы заң жобасында талқыланады және егер болашақта заң қабылданатын болса, "оралман" ұғымы "қандас" сөзімен ауыстырылады", - деді Нұрымбетов.
"Көші-қон процестерін реттеу мәселелері бойынша кейбір заңнамалық актілерге өзгерістер мен толықтырулар енгізу туралы" заң жобасының қорытындысында көрсетілгендей, Отанға оралған этникалық қазақтарға қолайлы жағдай жасау және сыртқы еңбек көші-қонының тиімді жүйесін құру, көші-қон заңнамасын жетілдіру үшін осы заң жобасы әзірленді.
19 қыркүйек күні Қазақстан Президенті Қасым-Жомарт Тоқаев тарихи отанына оралған қазақтарға қатысты "оралман" сөзінен бас тартып, оның орнына "қандас" сөзін пайдалануды тапсырды.