Кеше қалалық АХАТ бөлімінде 20 сәбидің ата-аналарына туу туралы куәліктерін табыстаған қала әкімінің орынбасары Айгүл Арынғазиева осындай мәлімет келтірді, деп хабарлайды Zakon.kz.
Ол Тәуелсіздік күні қарсаңында өткен салтанатты рәсімде жас ата-аналарды құттықтап, әр сәбиге естелік сыйлықтар тарту етті.
- Қуаныштарыңыз құтты болсын! Сіздерге ана ретінде тілейтінім: балаларыңыздың денсаулығы зор болсын! Ақтөбеде күніне 50-60 бала дүниеге келеді. Мұны көбі біле бермейді. 10 күннің ішінде жаңа 500 ақтөбелік дүние есігін ашып жатады. Бұл қаланың агломерация орталығына айналып, көркейіп жатқанын көрсетеді, - деді Айгүл Арынғазиева.
Неке сарайының "Ұлттық залына" жиналған ақтөбеліктер бірін-бірі мемлекеттік мерекемен құттықтап, сәбилерінің алғашқы куәліктерін салтанатты түрде табыстағаны үшін алғыстарын жеткізді.
- Туу туралы кәлікті салтанатты түрде аламыз деп ойламадық. Ұйымдастырушыларға көп рақмет! Қуаныштымын. Әр отбасыда сәбидің тәтті күлкісі естілсін, - деді Ерік Ізғалиев.
2019 жылдың 11 айында Ақтөбе қаласының АХАТ бөлімі 12263 сәбидің өмірге келуін тіркеді, ал былтыр дәл осы кезеңде Ақтөбе қаласында 11939 бала өмірге келген, яғни туудың саны 3%-ға өсті.
