Қырғызстанның 850 мың азаматы шетелде уақытша немесе тұрақты тұрып жатыр.
Бұл туралы Консулдық қызмет департаментінің директоры Алмаз Имангазиев журналистерге баспасөз конференциясында хабарлады, деп жазады Орталық Азияның жаңалықтар қызметі.
Шетелдегі қырғызстандықтардың дені Ресейде жүр. Ресейдің көші-қон қызметіне Қырғызстанның 571 мың азаматы тіркелген.
Имангазиевтің хабарлауынша, Қазақстанда 35-45 мың қырғызстандық бар. АҚШ пен Канадада – 15-20 мың, Италияда - 5,5-6 мың, Біріккен Араб Әмірліктерінде – 4-5 мың, Ұлыбританияда – шамамен 2 мың, басқа да елдерде – шамамен 10 мың.
Бұған қоса Ресейдің көші-қон қызметі дайындаған "қара тізімге" 60 мың қырғызстандық ілінгені мәлім болды. Бұл тізімде 2017 жылы 100 мыңнан астам қырғызстандық болған.
