"Қазақмыс" Медициналық орталығы" ЖШС-інің ақпаратынша, Амангелді Мініғұловтың денсаулығы оңалды. Денсаулығына қауіп жоқ, деп хабарлайды zakon.kz baigenews.kz-ке сілтеме жасап.
Ол өзінің қызметтік міндеттеріне әлі кіріскен жоқ, үйінде демалуда.
Мініғұлов "Кәсіпқорған" кәсіподағы төрағасы марқұм Тоғызбай Тәжбенов жасаған шабуылдан кейін екі қылмыстық іс бойынша тергеушілерге куәлік беруде.
Кісі өлтіруге оқталу бабымен қозғалған іс бойынша Амангелді Мініғұлов жәбірленуші, өзін-өзі өлтіруге дейін жеткізу бабымен ашылған іс бойынша ол куәгер.
21 қаңтарда "Кәсіпқорған" кәсіподағының төрағасы Тоғызбай Тәжбенов қызметтік кеңседе өзара сөзге келген "Қазақмыс корпорациясы" ЖШС бас директоры Амангелді Мініғұловты төбелес кезінде пышақпен жарақаттады.
Сондай-ақ, екеуіне ара түспек болған корпорацияның қызметкері Сабыржан Тембаев та кеуде тұсынан пышақ жарақатын алды. Осы жайттардан соң кәсіподақ қызметкері өз-өзіне қол жұмсады.
