Алматыдағы Орталық қалалық клиникалық ауруханасында тағы 35 медицина қызметкерінен коронавирус анықталды, деп хабарлайды zakon.kz.
№12 ауруханада жаңа вирус түрін жұқтырған дәрігерлердің жалпы саны қазір 182-ге жетті. Бұл туралы Алматы Қоғамдық денсаулық басқармасы хабарлады.
Осыдан бір күн бұрын - 14 сәуірде Орталық қалалық клиникалық ауруханада КВИ жұқтырған дәрігерлердің саны 147-ге жеткені белгілі болды. Осыдан кейін аурухананың бас дәрігері Алмаз Жувашев жұмыстан босатылды. Ол аурухана қызметкерлеріне қысым жасалмас үшін қызметінен өз еркімен кеткенін мәлімдеді. №12-ші аурухананың бас дәрігерінің міндеті Марат Абдуллаевқа жүктелді.
Қаланың бас санитарлық дәрігері Айзат Молдағасимова ауру жұқтырған дәрігерлер алғашқы кезде коронавирус белгілері барына қарамастан, дене қызуын түсіретін дәрілер ішіп, өз жұмысын жалғастыра бергенін айтты.
Ол инфекция көзі анықталғанын да айтты. Ол - наурыз айының соңында МРТ-ға тексерілген науқас. Науқас бөлім дәрігерімен және медбикемен байланыста болған.
