Елімізде COVID-19 індетін жұқтырғандар саны мың жарым адамнан асып кетті. Денсаулық сақтау министрлігінің мәлімдеуінше, қазір Қазақстанда пандемия шыңына жетті. Айтпақшы індет жұқтырған медиктер саны да 400-ден асып кетті. Олардың 43 пайызы Алматы, 33 пайызы Нұр Сұлтан және 23 пайызы Шымкент қаласының еншісінде.
Айта кету керек қазір медицина қызметкерлері ерлікке бергісіз еңбек етуде. Бастарын қатерге тіксе де, үй көрмей жұқпалы індетпен жағаласып жатқан абзал жандар біраз қиындық көрсе де гиппократ алдындағы антқа адал екендіктерін айтып ағынан жарылуда. Бұл туралы Еуразия бірінші арнасы хабарлайды.
Гүлжан Шаяхметова, инфекционист дәрігер:
Мені егде тартқан ата-анам күтіп отыр. Көрмегелі көп болды.Мен олар үшін алаңдаймын, олардың мені ойлап жандары қалмайды. Індет жұқтырып алды ма екен деп қорқады. Телефоннан дірілдеген дауыстарын естігенімде жүрегім езіліп кете жаздайды. Бірақ менде бәрі жақсы. Ауру-сырқаудан аманмын.
Қорғаныш құралдары жетіспеушілігі себебінен медиктер жаппай вирус жұқтырып жатыр деген шудың болғаны кеше ғана. Дегенмен салалық вдеомствода тапшылық мәселесі жоқ деп сендіріп отыр. Айтпақшы Алматы қаласының қоғамдық денсаулық сақтау басқармасы тәуекел тобына жатпайтын, яғни науқастармен тікелей байланыста болмаған қызметкерлерге де қаржылай көмек көрсету мәселесін қарастырып жатыр екен.
