Алматының денсаулық сақтау басқармасында коронавирусқа қарсы күреске бөлінген қаражаттың жұмсалуына байланысты тексеру жүріп жатыр, деп хабарлайды zakon.kz.
Алматының денсаулық сақтау басқармасының басшысы Камалжан Надыров өз ведомствосына құқық қорғау органдарының қызметкерлері келгенін растады. Олар Covid-19-ға қарсы күреске бөлінген қаражаттың жұмсалуына байланысты тергеу бастады. Тергеудің қандай баппен басталғанын ол айтпады.
- Рас, Covid-19-ға қарсы күреске бағытталған бюджет қаражатының жұмсалуын бақылауға байланысты тергеу шаралары жүріп жатыр. Қылмыстық іс қозғалды деген нәрселер туралы ештеңе айта алмаймын. Бұл сұрақты тиісті құқық қорғау органдарына бағыттаған жөн. Ал денсаулық сақтау басқармасы қазір штаттық режимде жұмыс істеп жатыр. Жұмысқа ешқандай шектеулер салынған жоқ. Құқық қорғау органдарының қызметкерлері бюджет қаражатының дұрыс пайдаланылуын бақылау бойынша өз жұмыстарын атқарып жатыр. Біз алдымызға қала басшылығы жүктеген міндеттер мен мақсаттарды орындау үшін өз жұмысымызды жалғастырып жатырмыз, деді Камалжан Надыров.
