АҚШ президенті Дональд Трамп өзінің Twitter-інде Америкада өткен сайлауда берілген дауыстарды санауды тоқтатуға шақырды, деп хабарлайды zakon.kz.
"Санауды тоқтатыңдар", - деп сүйкеп жіберді ол Twitter-де.
АҚШ-та дауыс беру 3-ші қарашада өтті, алайда Америка халқының бұрын-соңды болмаған бөлігі бұл жолы пошта арқылы дауыс берді. Сол себепті көптеген штаттарда дауыс санау әлі жалғасып жатыр.
Ал Трамп болса, сайлау учаскелері жабылғаннан кейін пошта арқылы келген бюллетеньдерді санауға болмайды, деп шырылдай жөнелді.
Трамп сәрсенбіге қараған түні өзінің сайлауда жеңгенін жария етіп, демократтар "дауыс ұрлайын деп жатыр" деген айып тақты.
Бірқатар штаттарда, мысалы Мичиган мен Висконсинде қазіргі президент басында жеңіп келе жатқан, бірақ сосын оның қарсыласы Джо Байден озып кетті.
Трамп бұл жағдайды "біртүрлі" деп бағалап, дауласуға кірісті.