Павлодар облысының тағы 10 мың тұрғыны сапалы ауыз суға қол жеткізді, деп хабарлайды zakon.kz облыстық жер қойнауын пайдалану, қоршаған орта және су ресурстарын басқару.басқармасына сілтеме жасап.
"6 қарашада Май топтық су құбырында (МТСҚ) су тазартатын технологиялық жабдық іске қосылып, Май ауданының 10 мың адам мекен ететін 14 ауылдық елді-мекені тазартылған ауыз сумен қамтамасыз етілді. 15 желтоқсанға дейін Көктөбе ауылындағы кентішілік желілердің екінші кезеңінің құрылысы аяқталады" деп хабарлады басқармадағылар.
Естеріңізге сала кетейік, МТСҚ құрылысына тапсырыс беруші - ҚР Экология, геология және табиғи ресурстар министрлігінің Су ресурстары комитеті, бас мердігер - "Қазсушар" РМК. Ал 14 ауылдық елді-мекендегі кентішілік желілер құрылысына тапсырыс беруші - Май ауданының әкімдігі.
2020 жылдың соңына дейін Павлодар облысында ауыл тұрғындарының 90% -ы сапалы ауыз суға қол жеткізеді деп хабарланған болатын. Биыл облыста ұзындығы 605 шақырым болатын 56 ірі су құбыры салынуда. Үш жыл ішінде Павлодар облысында барлық ауыл тұрғындарын сапалы ауыз сумен қамтамасыз ету жоспарлануда.
