Қазақстан Парламентінің депутаттары демалысқа шықты, деп хабарлайды zakon.kz.
Қос палатаның бірлескен отырысында Мәжіліс төрағасы Нұрлан Нығматулин ҚР Парламентінің VII шақырылымының бірінші сессиясының жабылғанын мәлімдеді.
Заңдарды қарау мен қабылдаудан басқа, осы сессия барысында депутаттар еліміздің экономикалық және әлеуметтік өміріндегі өзекті мәселелер бойынша бірқатар іс-шаралар ұйымдастырды. Парламент қабырғасында өткен сессия барысында санитарлық-эпидемиологиялық шектеулерге қарамастан, үш үкіметтік сағат, бір парламенттік тыңдалым, 35 дөңгелек үстел және комитеттердің тыс жерде 8 отырысы өтті. Сонымен қатар, еліміздің тәуелсіздігінің 30 жылдығына орайластырылған "Астанадағы ЕҚЫҰ Саммиті 2010 - тарихи маңызы мен өзектілігі" тақырыбында осы оқиғаның 10 жылдығына арналып онлайн-конференция ұйымдастырылды, - деді ол.
Сонымен қатар, ол өткен сессия барысында Nur Otan партиясы, Халықтық партия және "Ақ жол" партиясының барлық үш парламенттік фракциялары, сондай-ақ Қазақстан халқы Ассамблеясының депутаттық тобы белсенді жұмыс жасағанын атап өтті.