Денсаулық сақтау министрлігі жалған екпе құжатын сатып алғандарға рақымшылық жасауды қарастыруда. Бұл туралы Алматы қалалық қоғамдық денсаулық сақтау басқармасының басшысы Нариман Табынбаев мәлімдеді, деп хабарлайды zakon.kz.
Жалған вакцина паспортын сатып алғандарға рақымшылық жасау мәселесі Денсаулық сақтау министрлігінде көтерілуде. Қазір жобаға енді. Олардың мемлекет қаржыландырған науқанға зиян келтіргенін түсінеміз. Сондықтан бұл мәселені жеңілдетілген түрде қарастыруға болмайды. Вакцина паспортын сатып алған адамдар вакцинаны ала алмайды, себебі олар базада вакцина алған деп көрсетілген. Сондықтан бұл мәселе әлі де қаралуда, - деді Нариман Табынбаев Өңірлік коммуникациялар қызметінде өткен брифингте.
Алматының бас санитарлық дәрігері Жандарбек Бекшин де өз пікірімен бөлісті. Ол вакцина паспортын сатып алғандарға енді вакцинаны ақылы түрде егу керек деп есептейді.
Бұл менің ұсынысым. Тұрғындар да солай дейді. Мен де қолдаймын, себебі олар зиян келтірді: біріншіден, олар вакцина алмады, екіншіден, ол жағдайларда вакцина далаға төгілген, сондықтан мен олар енді өз қаражаты есебінен егілуі керек деп есептеймін. Көптеген адамдар өз қатесін түсініп, жазып жатыр бізге, бірақ олар бюджетке зиян келтірді, - деді ол.
Бұған дейін хабарланғандай, Қазақстанда жалған вакцина паспортын сатып алу бойынша 60-тан астам қылмыстық іс қозғалды. Күні кеше пандемиямен күрес жөніндегі азаматтық штаб жалған вакцина құжатын сатып алғандарға рақымшылық жасау туралы бастама көтерген.