Сенат депутаттары Республикалық бюджеттің атқарылуын бақылау жөніндегі есеп комитетінің мүшесі Талғат Жақанды қызметінен босатты, деп хабарлайды zakon.kz тілшісі.
Ол бұл лауазымды 2016 жылдан бері атқарып келді. 31 тамызда ол басқа жұмысқа ауысуына байланысты қызметінен босату туралы Сенат төрағасы Мәулен Әшімбаевтың атына өтініш түсірді.
Қаржы және бюджет комитеті Сенат регламентінің 81-1 тармағын басшылыққа ала отырып, Республикалық бюджеттің атқарылуын бақылау жөніндегі есеп комитетінің мүшесі Жақан Талғат Амангелдіұлының өкілеттігін тоқтатып, оны қызметінен босатуды ұсынады, - деді Қаржы және бюджет комитетінің төрағасы Ольга Перепечина Сенаттың жалпы отырысында.
Перепечина Есеп комитетінде жұмыс істеген кезінде Талғат Жақан өзін жауапты және білікті басшы ретінде танытқанын баса айтты. Оның басшылығымен ұлттық холдингтер мен компаниялардың және Ұлттық қордың тиімділігіне қатысты аудит жүргізілген еді.
